周四（22日）西班牙法庭就前巴西國腳丹尼爾涉嫌強姦一案，裁定呢位球星罪名成立，判佢入獄4年零6個月。

現年40歲嘅丹尼爾，被控於2022年12月喺巴塞隆拿一間夜店性侵及襲擊一名23歲女子。丹尼爾予以否認，期間佢不斷改口供，最初話唔識女事主，之後又話同女事主有面之緣，並稱當日自己飲大咗，其後又承認係雙方同意下進行性交 ，強調冇強姦對方，不過法醫嘅證供指飲酒後對佢認知能力，只有輕微影響。丹尼爾自從上年1月便被拘留及不准保釋，雖然多次甲請假釋，都未獲批准，檢控官更要求法庭判處9年刑期，而女事主嘅代表律師更要求判佢坐12年監，最終被判入獄4年零6個月，以及要賠償15萬歐元畀女事主。

丹尼爾曾效力巴塞隆拿、祖雲達斯及巴黎聖日耳門等豪門，職業生涯共贏得41座獎盃，巔峰時期絕對係世界最強右後衞之一，佢亦曾代表巴西國家隊上陣128場，僅次於卡福同尼馬，如今色字頭上一把刀，衰強姦搞到身敗名裂。